NBA Africa and Quest Water Global don announce one multi-year collaboration wey go make dem build or renovate 55 basketball courts for Democratic Republic of Congo by 2030, as tribute to Dikembe Mutombo. Di project dey back NBA Africa bigger goal to build or renovate 1,000 courts across Africa for di next ten years.
Dem inaugurate di first court on September 29 for Cercle Onatra inside Kinshasa, wia young Mutombo take im first rebounds before e comot go NBA. Di number 55 don paint for di middle of di court. Di next court suppose open for di next few weeks for Mbuji-Mayi, di town wia Mutombo take born.
"Our collaboration with Quest Water Global go expand access to basketball for Democratic Republic of Congo, one country wey get special place for di history of our sport because of di big impact and lasting legacy of Dikembe Mutombo," Clare Akamanzi, Executive Director of NBA Africa, tok.
Quest Water Global, wey dey specialise for water access solutions and infrastructure, don become NBA Africa official partner for infrastructure development for DRC. Di launch event for Kinshasa also include one Jr. NBA/Jr. WNBA session wey 80 local coaches come attend.
Mutombo wife, Rose, say di project show di convictions wey her husband hold dear. Di four-time NBA Defensive Player of the Year and eight-time All-Star die for 2024 at di age of 58. E contribute for di opening of Biamba Marie Mutombo Hospital for Kinshasa for 2007, wey dem name after im mama.
